VI. Wir loben dich, herre, das du úns hast gesuchet mit diner demutekeit. Wir loben dich, herre, das du úns hast behalten mit diner barmeherzekeit. Wir loben dich, herre, das du úns hast geheret mit diner [güete.] Wir loben dich, herre, das du úns hast gefuoret mit diner miltekeit. Wir loben dich, herre, das du úns hast geordent mit diner wisheit. Wir loben dich, herre, das du úns hast beschirmet mit diner gewalt. Wir loben dich, herre, das du úns hast gehelget mit diner edelkeit. Wir loben dich, herre, das du úns hast gewiset mit diner heimlichkeit. Wir loben dich, herre, das du úns hast gehoehet mit diner minne. XV. Seiest wilkomen, liebú tube, Du hast so sere geflogen in dem ertriche, Das dine vedern sint gewahsen in das himelriche. XVI. Du smekest als ein wintrúbel, Du rúchest als ein balsam, Du lúhtest als dú sunne, Du bist ein zuonemunge miner hoehsten minne. XVII. O du giessender got an diner gabe, O du vliessender got an diner minne, O du brennender got an diner gerunge, O du smelzender got an der einunge mit dinem liebe, O du ruowender got minen brústen! Ane dich ich nút wesen mag! XVIII. O du schoene rose in dem dorne, O du vliegendes bini in dem honge, O du reinú tube an dinem wesende, O du schoenú sunne an dinem schine, O du voller mane an dinem stande! Ich mag mich nit von dir gekeren. XXII. In der groesten sterki kumt si von ir selber, In dem schoensten liehte ist si blint an ir selber Und in der groesten blintheit sihet si allerklarost. In der groesten klarheit ist si beide tot und lebende. Ie si langer tot ist, ie si vroelicher lebt; Ie si vroelicher lebt, ie si mer ervert; Ie si minner wirt, ie ir mer zuoflússet; Ie si sich mere vorhtet. Ie si richer wirt, ie si armer ist; Ie si tieffer wonet, ie si breiter ist; Ie si gebietiger ist. Ie si me arbeitet, ie si sanfter ruowet; Ie si me begriffet. Ie sin lust me wahset, Ie ir [hochzit] groesser wirt; Ie das minnebet enger wirt, Ie die umbehalsunge naher gat; Ie das muntkússen suesser smekket, Ie si sich minneclicher ansehent; Ie si sich noeter scheident, Ie mer er ir gibet; Ie me si verzert, ie me si hat; Ie si demueteklicher urlop nimt, Ie e si wider kumt; Ie si heisser blibet, Ie si e entfunket; Ie si mere brennet, ie si schoener lúhtet; Ie gottes lob mer gebreitet wirt, Ie ir girheit groesser blibet.